ШТО ДА ПРАВИМЕ КОГА ЌЕ ЈА ИЗГУБИМЕ МОТИВАЦИЈАТА ЗА ТРЕНИНГ?

Доколку сте од оние кои веќе подолго време редовно вежбаат или сте од оние кои сега слободното време го користат за интензивен тренинг, тогаш многу добро знаете дека многу лесно можете да го изгубите почетниот ентузијазам и мотивацијата за вежбање. Често мислиме дека најтешко е да почнеме со вежбањето, но всушност најтешко е да  се задржи мотивацијата и континуитетот зза вежбање.

Самиот факт дека вежбањето и тренингот ќе не направат поздрави и ќе ни го подобрат нашиот изглед не е доволен мотиватор за да се продолжи со тренингот и вежбањето. Затоа е потребно да се пронајде мотивација, а тренингот да се направи што поинтересен за што побрзо да се добијат посакуваните резултати. Еве неколку наши предлози што да направите кога ќе ја изгубите мотивацијата и рутината за тренинг.

 1. Направете распоред за тренинг во календарот и одредете ја вашата цел

Најдобро би било кога тренингот ќе го сфатите како и останатите дневни обврски, а во склад на нив ќе го направите и неделниот распоред за вежбање кој ќе го запишете во вашиот телефон или пак ќе се послужите со традиционалниот начин, односно распоредот за вежбање ќе го напишете на хартија. Покрај тоа, во календарот ставете го и точното време на почнување како и завршување на тренингот. Така ќе ги намалите шансите за изговор за да не го одржете тренингот.

Доколку тренинг планот го препуштите на дневната мотивираност за вежбање и вашите тренинзи зависат од расположението за тренинг за секој ден посебно, тогаш многу лесно може да се случи да пронајдете изговори да не го одржите тренингот. Одредете ја вашата цел која сакате да ја постигнете и уживајте во чувството кое ќе имате кога ќе видите дека секој месец напредувате и не отстапувате од зацртаните планови.

 2. Променете го начинот на тренинг и сменете ја рутината

Константното повторување на некои постапки или процеси кај луѓето предизвикува монотонија и чувство на досада, а така е и кога е во прашање тренингот. Потрудете се да не ги правите константно истите вежби и повремено да го променувате начинот на вежбање. Воведете новини, како кардио тренинг, интензивен тренинг или вежбање во група. Многу брзо можете да ја изгубите мотивацијата за тренинг доколку во подолг временски период ги повторувате истите вежби и тренинг рутината, па затоа колку поразличен ви е тренингот, толку подолго ќе се задржите на него.

 3. Пронајдете тренинг партнер

На голем број луѓе потребен им е некој кој ќе ги мотивира и поради кој тие повеќе ќе се залагаат на тренингот. Затоа кога ќе навлезете во тренинг рутината пробајте да пронајдете некој со кој ќе се чувствувате добро и опуштено и на кого можете да сметате дека нема да ве изневери кога станува збор за договорите околку тренинг. Покрај тоа, во добро друштво секогаш тренингот е интересен, а може да биде и поинтересен доколку можете да се натпреварувате со својот тренинг партнер.  

Она што е важно во овие ситуации е да водите сметка дека времето кое сте го одвоиле за тренинг сте го поминале тренирајќи, а секојдневните разговори остевете ги настрана.

 4. Опремете се со соодветна музика

Готово да не постои личност која не слуша музика додека тренира, затоа што општо познато е дека музиката дополнително опушта и мотивира. Можеби она што не сте го знаеле е дека правилниот избор на музика дополнително може да ве мотивира за време на тренингот. Направете своја „плејлиста“ и одберете енергични и брзи песни како би можеле константно да имате ритам и мотивација.

 5. Водете сметка за количината на храната која ја јадете и оброците пред тренинг

Дали некогаш ви се случило да немате желба за вежбање непосредно пред тренингот? Причини за тоа може да има многу, а може и да сте изеле само премногу храна и со тоа сте го забавиле вашиот организам. Покрај прејадувањето, една од причините зошто го прескокнувате тренингот и губите желба за него е и конзумирањето на нездрави намирници кои прават да се чувствувате мрзливо и демотивирано. Водете сметка да имате здрави оброци кои ќе вклучуваат овошје и зеленчук, доволно протеини, здрави масти и јагленохидрати, а пред самиот тренинг јадете нешто што ќе ја зголеми вашата енергија без чувство на тежина и желба да си легнете и одморите.

 6. Понекогаш ни е потребна само пауза

Можеби овој совет ќе ви изгледа чудно, но доколку некогаш почувствувате дека немате желба за вежбање можеби сте исцрпени од секојдневните активности. Дозволете му на вашето тело но и мозок малку да се одмори, да се рестартира. Доколку е неопходно земете и неделен одмор, затоа што така ќе разберете колку добро се чувствувате кога вежбате, а мускулите ќе ги одморите за новите предизвици.

Запомнете, тренингот и вежбањето може да донесе големи промени во вашиот живот, а за да го направите неизоставен дел од вашиот живот ќе мора да пронајдете нови и интересни начини на вежбање. Доколку успеете да задржите континуитет во вежбањето, не само што ќе се чувствувате полни со енергија туки и вашата самопочит ќе се зголеми.

Проверете кои фитнес апликации ви ги препорачуваме за вежбање во вашиот дом, а комплетната опрема за тренинг можете да ја пронајдете на нашиот онлајн шоп.

Тимот на Sport Vision