Пред да ги дефинираме нашите впечатоци од последните две епизоди на документарната серија „The Last Dance“, да се потсетиме на најдобрите реченици од претходните епизоди.
Уште од моментот на појавување, документарната серија The Last Dance стана апсолутен хит на Netflix и неизоставна препорака на сите „must watch“ листи. Сите го гледаат – и љубителите на спортот и оние кои никогаш досега немаат излезено на терен, меѓутоа со сигурност имаат слушнато за Michael Jordan и легендарниот тим Chicago Bulls кој во 90-тите доминираше во кошарката ширум светот.
Додека ги дефинираме впечатоците откако ги изгледавме последните епизоди од оваа серија, кои во Америка беа емитувани минатата недела, а кај нас во понеделник, да се потсетиме на најдобрите реченици и цитати кажани во овој документарец, кои со сигурност ќе станат вистинска кошаркарска лекција за младите генерации кои доаѓаат.
"ПОБЕДАТА ИМА СВОЈА ЦЕНА И ЛИДЕРСТВОТО ИМА СВОЈА ЦЕНА."
Во една од епизодите на The Last Dance, Jordan на едно од прашањата дали неговата упорност и тврдоглавост имаат придонесено често да биде погрешно сфатен, тој одговори: „Ги туркав напред луѓето кои не го посакуваа тоа, ги предизвикував оние кои не сакаа да бидат предизвикани. Го имав тоа право. Меѓутоа, една работа е сигурна – никогаш не побарав нешто од другите што и самиот го немам направено.“
"КОГА ГО КАЖУВАА МОЕТО ИМЕ, ТРЕБАШЕ ДА ГО СПОМЕНАТ И ИМЕТО НА SCOTTIE PIPPEN."
Кошарката е тимски спорт, а Michael Jordan беше лидер на еден од најдобите тимови кој светот го има видено. И никогаш ја нема скриено важноста на неговите соиграчи, што уште еднаш го докажа во документарецот. Една од речениците која со сигурност ќе остане запаметена е: „Кога и да го кажаа името Michael Jordan, требаше да го споменат и името на Scottie Pippen. Говореа тој ги освои сите шампионати – меѓутоа немаше да ги освојам без Scottie Pippen. Поради таа причина го сметам за најдобар соиграч на сите времиња.“
"НА ТЕРЕНОТ ТОА НЕ БЕШЕ MICHAEL JORDAN. ТОА БЕШЕ ГОСПОД ПРЕТВОРЕН ВО MICHAEL JORDAN. "
Како да се надмудри легендарниот играч на Boston Celtics, Larry Bird, човекот кој со своето знаење им предизвикуваше главоболки на противниците? Врвен дриблинг и скок шут кој секогаш завршува со погодок. На Jordan тоа му појде од рака за време на првиот круг од Playoff- от во 1986, со што најави постигнување на неверојатни 63 поени, колку што постигна во вториот натпревар. После таа серија, Bird изјави: „На теренот тоа не беше Michael Jordan. Тоа беше Господ претворен во Michael Jordan.“
Last Dance не го сврте вниманието само на здравиот ривалитет, туку и на големото почитување кое играчите, а особено соиграчите треба да го имаат едни кон други. Поради тоа ќе остане запаметена реченицата на James Worthy, соиграчот на Jordan од универзитетскиот тим на Северна Каролина: „Бев подобар од него – отприлика две недели.“
"MOJОТ КАРАКТЕР БЕШЕ ТАКОВ, КОГА ЌЕ ИЗЛЕЗАМ МОРАМ И ДА ПОБЕДАМ ПО СЕКОЈА ЦЕНА."
Во една од епизодите на серијалот, Jordan на најдобар можен начин го опиша менталитетот на еден победник. Неговата единствена желба била и неговите соиграчи да бидат на исто ниво како него. Дали тоа понекогаш било премногу? Секако, затоа што Michael беше непобедлив. Тоа го потврдува и оваа реченица:
„Мојот карактер беше таков, кога ќе излезам, морам и да победам по секоја цена. Доколку не сакате да играте со таков став, тогаш нема потреба да бидете со мене, бидејќи ќе ве исмејувам додека не бидете на истото ниво. А ако не го достигнете истото ниво, во тој случај ќе поминете низ пеколот.“
"ДАЛИ БЕШЕ СИМПАТИЧНО МОМЧЕ? ТОЈ НЕ МОЖЕШЕ ДА БИДЕ ТАКОВ. "
Една од речениците која можеби најдобро го опишува Michael Jordan, во документарецот The Last Dance ја изговори неговиот соиграч B.J. Armstrong. Како некој кој барал совршенство од себе, а и од луѓето околу себе, Jordan никогаш не бил доживуван како симпатично момче. „Дали беше симпатично момче? Тој не можеше да биде таков. Исклучително тешко беше да се игра со него доколку не си вистински вљубеник во кошарката, бидејќи тој беше многу упорен“ кажа J.B. Armstrong.
"САКАВ ДА ПОБЕДАМ, МЕЃУТОА ПОСАКУВАВ И ТИЕ ДА ПОБЕДАТ , А ЈАС ДА БИДАМ ДЕЛ ОД СЕТО ТОА. "
Реченица која привлече многу внимание и доказ дека Jordan никогаш не посакал победа само за себе. Иако често ги критикувал неговите соиграчи, MJ неизмерно ги сакал и се грижел за сите нив. Никогаш не посакал победа само за себе, туку за сите нив, а доказ за тоа е реченицата: ‘’Сакав да победам, меѓутоа посакував и тие да победат, а јас да бидам дел од сето тоа.’’
MICHAEL JORDAN ЗА НАТПРЕВАРУВАЧКИОТ КАРАКТЕР
Многу важни реченици се изговорени во овој документарен серијал и секоја од нив е брилијантна на свој начин. Во една од сцените, каде што Michael Jordan зборува за својот натпреварувачки карактер и начинот на кој пристапува кон играта, се гледа неговата магија, која ја пренесувал и на теренот. Веројатно поради тоа својот победнички менталитет го опиша вака: „Види, јас не морам да го правам ова. Го правам поради тоа што сум. Така се однесував и кон играта. Таа е дел од мојот карактер. Ако не сакаш да играш на ист начин, не го прави тоа. Крај на приказната.“
"НЕМА ДА ПОВЕРУВАШ ВО ОВА, МЕЃУТОА MICHAEL САКА ДА СЕ ПОВЛЕЧЕ ОД КОШАРКАТА. "
Ниту една реченица ја нема стресено повеќе целата NBA лига од оваа. Како вистинска бомба! Меѓу другото, замислете да сте сопственик на Bulls и да се појави агентот на Jordan и да ви соопшти дека најдобриот играч на светот сака да се посвети на бејзбол. Зарем тоа не е доволно голем доказ за непредвидливоста и непоколебливоста на Jordan?
Нема сомнеж, на документарецот The Last Dance ќе се навраќаме уште многу по завршување на неговото премиерно емитување. Причината се крие во тоа што светот многу одамна нема видено подобра приказна за спортот, пријателството, ривалството, љубовта кон она што го работите и вистинската посветеност – сето она што често го забораваме, а не би требало да е така.
Photo credit: businessinsider.com, hoopshabit.com, newyorker.com
Ваш Sport Vision
.svg)
